ДӨНЬЯДА СҮЗЕМ КАЛЫР...

ГАКЫЙЛЬ СӘГЫЙРЕВ 

(15.02.1938-29.07.2009) 

Сагышларым – сары яфрак, төште җилгә.

Кайгыларым – кара яфрак, очты җилгә.

Шатлык дигән яшел яфрак күренмәсә,

Нишләр йөрәк – шәрә ботак, шәрә кәүсә?..

***

Ә мин ятим – яраланган бөркет,

Яшәвемнән хәтта оялам.

Булам кайчак, яшен кебек ярсып,

Атылырга әзер кыядан.

***

Уңган кеше үз кулыннан

Бәхетен эзләп табар…

***

«Мин – татар!» – дип, «Без – татар!» – дип,

Күпләр йөри күкрәк бәреп.

Татарлыкны югалтмадык, –

Үттек юлның иң хәтәрен.

Барып керсәң үз өенә,

Үсеп килгән бәбкәләре

Тәтелдиләр кяфер телдә,

Такмаганнар гына тәре...