Тиз тозланган кыяр

Моның өчен 8-10 см озынлыктагы кыярлар алына. Нежинский сорты булса яхшырак, аларны салкын су белән юалар, очларын кисеп ташлыйлар.

Кыяр тозлыйсы савытны әйбәтләп юарга, төбенә юган кара карлыган яфраклары, укроп, духовкада яки мичтә кыздырып алган арыш икмәге салырга. Аннан 2-3 кат кыяр тезәргә, яңадан карлыган яфраклары, вак итеп тураган керән тамыры яки аның яшь яфрагын, сарымсак, берничә лавр яфрагы салырга да тагын кыярлар тезәргә. Шулай итеп савытны тулганчы тутырырга. Кыярлар йомшармасын өчен имән яфрагы да салырга мөмкин.

Кыярлар күмелгәнче тозлык салырга, чиста чүпрәк белән капларга, тәлинкә яки түгәрәк агач такта куярга да аның өстенә авыр әйбер бастырырга. Тозлык никадәр җылы булса, кыярлар шулкадәр тизрәк тозлана. Бер тәүлек үткәч, аларны инде ашый башларга да мөмкин.

Тозлык ясау өчен 1 литр суга 40-50 г тоз салырга, барысын бергә кайнатып чыгарырга, 35-40°ларга кадәр суытырга да кыярлар күмелгәнче тутырырга.