Соңгы күрешү

Айлы кичтә очраштык без,
Су буйларын буйладык.
Сөйләшеп сүзләр бетмәде,
Таң атканын тоймадык.
Бер-берсенә ашкынса да,
Ике йөрәк тибеше.
Әйтелмичә калды ләкин,
Сүзнең иң кирәклесе.
Күзгә-күз карашырга да.
Икебез дә кыймадык.
Тулган айдан, йолдызлардан,
Бер-беребездән оялдык.
Таң атканчы йөрдек шулай,
Җитәкләшеп кулга-кул.
Хәзер белдем бу очрашу
Соңгы күрешү булган ул.
Гөлшат Зәйнашева
Фото: pixabay