Әдәби мирас Уку өчен 1 минут

Гамил Афзал. Карап-карап торгач...

Администратор сайта

Караулар 706

Дата 18 август 2019

Түп-түгәрәк кызыл йөздә
Ясалма якты чырай.
- Карап-карап торам сезгә,
Сез композитор бугай.
Һәркемнең хезмәте изге,
Илһамнар бирсен Ходай.
- Карап-карап торам сезгә,
Сез архитектор бугай.
Артистлар да килә безгә
Уңышлар жыйган көздә.
- Карап-карап торам сезгә,
Сез кулай кеше безгә.
Алга китүләр бар бездә,
Кырларда уңа бодай.
- Карап-карап торам сезгә,
Сез корреспондент бугай.
Әйдә, тикшер, гаеп эзлә,
Ник алай да,ник болай?
- Карап-карап торам сезгә,
Сез тикшерүче бугай...
Табак битле кызыл йөздә
Ясалма якты чырай.
- Карап-карап торам сезгә,
Сез зур начальник бугай...
- Кайнар итеп кулны кыстың,
Теләсәң ничек сына,
Мин начальник түгел, дустым,
Шигырь язучы гына.
- Шигырь чыгарасың, димәк,
Сәнәгең, көрәгең юк,
Тамак туйдырырга кирәк,
Бер рәтле һөнәрең юк.
Йөри шунда малай-шалай,
Яза да - тибә трай...
Усал карап куйды агай,
Сүрелде якты чырай.

#Гамил Афзал #Яңалыклар #Редакция хәбәрләре

Кызыклы һәм файдалы язмалар белән танышып бару өчен Вконтакте төркеменә кушылыгыз.