Бир кулыңны, гүзәлем

Агым суга ташламыйлар
Ак каен каерысын;
Аккошлар да бергә-бергә,
Без нигә аерым соң?
Бир кулыңны, гүзәлем,
Синсез өзелә үзәгем.
Иртән торып тәрәз ачтым,
Гөрли күгәрченнәрем;
Бик сагындым, бәгырькәем,
Килә күрәселәрем.
Бир кулыңны, гүзәлем,
Синсез өзелә үзәгем.
Сандугач баласын тоттым
Урман аланнарыннан;
Синең хәлләреңне сорыйм
Былбыл балаларыннан.
Бир кулыңны, гүзәлем,
Синсез өзелә үзәгем.
Биек таудан чәчәк җыйдым,
Җыймадым сарыларын;
Үзең тапсаң, миңа да бир
Сабырлык даруларын.
Бир кулыңны, гүзәлем,
Синсез өзелә үзәгем.
Мәхмүт Хөсәен
Фото: pixabay