Айга кырын карама

9 АВГУСТ (ШИМБӘ)

Мәхәббәт, иҗат көне. Бернәрсә дә планлаштырмыйча, теләгән нәрсәне генә эшләү яхшы. Нерв һәм эндокрин системаларга, күзгә игътибарлырак булу сорала. Үпкәләшкән кешеләр белән дуслашыр вакыт. Яшелчәләрне күбрәк ашау файдалы.

Күзне саклыйк!

Һава торышының еш үзгәрүе, кояш яктысының җитмәвеннән күзләргә зур зыян килә. Витаминнар куллану мөһим. А витамины күздән яшь агуны туктата, «тавык күзе»ннән коткара, сурәтнең төгәллеген арттыра, челтәр катламының эшен яхшырта. В2 витамины күз һәм күз кабагы кызышуыннан саклый, эңгер-меңгердә күрү сәләтен яхшырта. В1 витамины күзнең үткенлеген кире кайтара. В12 күздәге кан әйләнешен яхшырта, картаюдан саклый. В6 витамины нервлы тартышуны бетерә. Д витамины күз мускулларын тартышудан саклый. С витамины күз мускулларының тонусын яхшырта, арыганлыгын баса.

10 АВГУСТ (ЯКШӘМБЕ)

Алдашу, ялганга бай көн. Бизләр системасы, бил, бөер, тире, сукыр эчәк зәгыйфь. Мунчага бару, массаж ясату, ач тору файдалы. Кәеф төшәргә мөмкин.

Күзләр өчен күнекмәләр

Күз мускулларын ныгыту зарур. Күнегүләрнең һәрберсен унар тапкыр кабатлыйлар, күнегүдән соң күзне кыскалап алалар. 1) Аска-өскә карыйлар. 2) Уңга-сулга карыйлар. 3) Диагональ буенча уңнан-сулга, аннан соң сулдан-уңга карыйлар. 4) Күз карашы белән түгәрәк сызалар. 5) Сигезле сызалар. 6) 3-5 секундка күзләрне йомалар, аннары 3-5 секундка ачалар. 7) Күзне йомалар, кулны ышкып җылыталар һәм җылы уч белән 1-2 минут буе томалап торалар (бу пальминг дип атала, күз ял итә).

11 АВГУСТ (ДҮШӘМБЕ)

Авыр энергетикалы көн. Күп аралашмаска, күз тиюдән, чит тәэсирләрдән сакланырга кирәк. Бурычка алырга да, бирергә дә ярамый. Нерв системасы, эчәклек, арканың өске өлеше зәгыйфь.

Зәйтүн мае

Зәйтүн мае ялкынсынуны баса, авыртуны җиңеләйтә, Альцгеймер авыруыннан саклый. Көн саен 1-2 чәй кашыгы май эчү картайгач та аек акылны саклап калу мөмкинлеге бирә. Майдагы олеин кислотасы исә күкрәк яман шеше килеп чыгу ихтималын 46 процентка киметә, барлыкка килгән шешнең үсүен туктата, даруларның тәэсирен көчәйтә. Зәйтүн мае начар холестеринны киметә, гипертония, инсульт, инфаркттан саклый, әмма аны артык күп кулланырга да ярамый - көненә 40 мл җитә (якынча 2 аш кашыгы). Иң яхшысы – майны яшелчә салатына сибеп ашау.

12 АВГУСТ (СИШӘМБЕ)

Үз-үзеңне танып-белү, уйлану көне. Өйдә булырга тырышырга, гаиләгә игътибарны арттырырга кирәк. Тәкәбберлек күрсәтергә ярамый. Яңа белем җиңел үзләштерелә. Нерв системасы, сизү әгъзалары, кан тамырлары, ашказаны зәгыйфь.

13 АВГУСТ (ЧӘРШӘМБЕ)

Сәяхәткә чыгу, теләсә нинди эш башлау өчен айның иң кулай көне. Кеше хәлиткеч карарлар кабул итәргә сәләтле. Физик эш белән шөгыльләнү, җәяү йөрү, чыныгу файдалы. Саф һавада күбрәк булу, табигать белән хозурлану кәефне күтәрә. Умырткалыкның аскы өлеше, әвернә сөяк, аяк зәгыйфь.

Чөгендерле кефир

Канны, тамырларны чистарту өчен, 1 стакан кефирга 2 аш кашыгы чөгендер согы, ярты лимон согы, 2 аш кашыгы изелгән караҗиләк кушып, көненә 2 тапкыр ач карынга эчәләр.

14 АВГУСТ (ПӘНҖЕШӘМБЕ)

Акыл җыю, белем алу көне. Юмарт булырга, ашау-эчүдә үзеңне чикләмәскә кирәк. Күбрәк аралашкан саен, яхшы тәэсирләр дә арта бара. Кан әйләнеше системасы, буыннар, умырткалык зәгыйфь.

Кан басымын күтәрү

Кан басымын күтәрү өчен, 50 грамм каһвә орлыгын кыздырып, тарттыралар, шуңа 250 грамм бал, 1 лимон согы кушып болгаталар да, көненә 3 тапкыр, ашаганнан соң 2 сәгать үткәч, 1әр чәй кашыгы кабалар. Катнашманы суыткычта саклыйлар.

15 АВГУСТ (ҖОМГА)

Авыр энергетикалы көн. Тәвәккәл адымнар ясау хупланмый. Арып-талганчы эшләргә киңәш ителми. Дару үләннәре белән дәвалану уңай нәтиҗә бирә. Иҗат белән шөгыльләнү өчен яхшы вакыт.

Маринадланган кыяр

3 литрлы банка төбенә дүрткә бүленгән кишер, 2 баш кечкенә суган, берничә бүлем сарымсак, карлыган һәм чия яфрагы, укроп башлары, керән, түгәрәк кара борыч салып, юылган кыярларны тыгызлап тутыралар, өстенә кайнап торган су коеп, 15 минут тоткач, шул суны агызып алалар да, 5 чәй кашыгы тоз, 10 чәй кашыгы шикәр, 100 грамм 9 процентлы серкә салып, кайнатып чыгаралар, кыяр өстенә агызып, тимер капкач ябалар һәм юрганга төреп суыталар.

«Мәдәни җомга» газетасы 

Кызыклы һәм файдалы язмалар белән танышып бару өчен «Вконтакте» төркеменә кушылыгыз.