Алинә Заһитова спорт төрен алмаштырган!

2018 елда Көньяк Кореянең Пхенчхан шәһәрендә узган Олимпиадада җиңү яулаган Алинә Заһитова «Вечерний Ургант» тапшыруында бала чагында фигуралы шууны чак кына ташламый калуын сөйләгән.
Спортчы сүзләренчә, 6 яшьлек чагында аны әти-әнисе фигуралы шуу урынына нәфис гимнастика түгәрәгенә бирмәкче булган. Кыз әнисеннән гимнастик программаның аңа бозда ни рәвешле уңышка ирешергә ярдәм итәчәге белән кызыксынган һәм спорт төрен алыштыру турында җавап ишеткән.
«Мин ул чагында бик каты еладым һәм нәтиҗәдә әни мине яңадан фигуралы шуу түгәрәгенә алып килде», - дип уртаклашкан Алинә хатирәләре белән.
Моннан тыш, Алинә Заһитова хәбәр иткәнчә, ул баштарак Япониянең Сайтама шәһәрендә узган дөнья чемпионатына (ул анда җиңү яулады) барудан баш тарткан. Кыз әйтүенчә, ул чемпионатта «Россияне оятка калдырырга теләмәгән». Җанатарларының теләктәшлек белдереп әйткән сүзләре генә анда үз-үзенә ышаныч уята алган.
Әңгәмә ахырында алып баручы һәм тапшыруның кунагы «тактиль диктант»та ярышкан. Әлеге уен күзләрне бәйләгән килеш йомшак уенчыкларны «тану»дан гыйбарәт. Диктантта Алинә Ургантны откан.
Татар-информ