Исемнәр мәҗмугасе

Кулымдагы йөзегемнең

Сүз әйтмәгез кашына.

Дусларча бер төртик әле

Дуслар кабыргасына.

Кулымдагы йөзегемнең

Исеме – Бәшир, сүз дә юк.

«Намус» булгач, селкенми дә,

Што за намуссызлык!

Кулымдагы йөзегемне

Гариф Галиев, димен.

Җырларында билчән шаулый,

Эх, кайчан үсәр иген?!

Кулымдагы йөзегемнең

Исемнәре – Иделле.

Кибеп бетә күрмә, җаным,

Инешкә калдың инде.

Кулымдагы йөзегемнең

Исемнәре – Батталым.

Сулга барып тия кайчак

Уңга төзәп атканың.

Кулымдагы йөзегемнең

Исемнәре – Ләбибә.

Аягүрә йоклап йөрмә,

Кер, булмаса, бәллүгә.

Кулымдагы йөзегемнең

Исемнәре алтында.

Оч, Абдулла Әхмәт абзый,

Пингвиндай талпынма.

Кулымдагы йөзегемнең

Исемнәре – Арслан.

Слишком громко! Пожалуй, бу

Куелгандыр язмыштан... 

Кулымдагы йөзегемнең

Исемнәре – И.Туктар.

Исеңдәме исемнәрең

Шау-гөр килгән минутлар?

Кулымдагы йөзегемнең

Исемнәре – Нур Гайсин.

Утызынчы елда да шул,

Хәзер дә шул бер «Гайсин».

Йөзегемнең исемнәре

Абдулла Гомәр кебек.

Андыйларга литбездетность

Налогы чыгар кебек.

Кулымдагы йөзегемнең

Исеме – Илдар якташ.

Сүзгә, моңга интекмәбез,

Да здравствует Такташ!

Кулымдагы йөзегемнең

Исеме – Хатип Госман.

Эх: «Мин күккә күтәреләм», –

Дигән иде... Оныткан.

Кулымдагы йөзегемне

Афзал Шамов дидем ник?

Ташлар булгач, ник башладың?

Ихлас кебек идең бит!

Кулымдагы йөзегемнең

Исемнәре – Дәүли лә.

Таланты да, кирелек тә,

Мин-минлек тә дәү генә.

Кулымдагы йөзегемнең

Исеме – Шәүкәт Гали.

«Карлыгачлар» очмаганда,

«Дилбегәләр» саткалый.

Кулымдагы йөзегемнең

Исеме – Әхмәт Юныс.

Арбаң шыгырдый башлады,

Бер чара күрсәңче, дус!

Кулымдагы йөзегемнең

Исеме – Мәхмүт Хәсән.

Сигез сыер файда итмәс,

Симезен үрчетмәсәң.

Кулымдагы йөзегемнең

Исеме – Самат кына.

Сакал, үсеп, билгә җиткән,

Үсми тик канат кына.

Кулымдагы йөзегемнең

Кашлары төшкәне бар.

Уян, Кашшаф, дияр идем,

Авызым пешкәне бар.

Кулымдагы йөзегемнең

Атыдыр – Сибгат Хәким.

«Күп һәм төрле шагыйрь кирәк,

Минемчәрәк яз ләкин...»

Йөзегемнең исемнәре

Хөсни белән Әпсәләм.

Һай, шәп булыр иде сезне

Берләштерсәң, мәсәлән!

Йөзегемнең исемнәрен

Ник кабатлап торыйм гел.

Хөснидә – тел, синдә – колач,

Ә калганын үзең бел!