Уйладым уйның төрлесен...

(Шәүкәт Биктимеровның куен дәфтәреннән)

Кешене көлдерү – аның иркен, көчен, үзен җиңү дигән сүз, кешенең көлүе – җиңелүе.

***

Үз көчеңә ышану ул – җиңү.

***

Кешенең хәзерге тормышы һәм киләчәге турында фикер йөртү – чегәнлек ул.

***

Сәхнә – СССРның тормыш көзгесе. 

***

Мәхәббәт белән аның мәхәббәт кисәве булып көн-төн янучылар, көчсез һәм, гомумән, тормыш алдында тез чүгүчеләр – тормыш чүпләре алар.

***

Мәхәббәт – вакытлы, пүчтәк нәрсә. Яшьлекнең коры ләззәтләнүе. Картайгач, ул юкка чыга. Бала вакытта – уен ләззәте, яшь вакытта – мәхәббәт, картайгач – ахирәт турында уйлап ләззәтләнү.

***

Урманнарга барсаң, сызгырып кер –

курыкмаган ерткыч калмасын,

Урамнарда йөрсәң, сыздырып йөр –

сокланмаган кеше калмасын.

***

Кеше тормышындагы авыр моментлар онытылмыйлар һәм аларны искә алып сөйләү күңелле була. Чөнки син ул авыр шартларны җиңгән буласың, ә җиңү синең күңелеңне рәхәтләндерә.

***

Бабам куштан булмаган һәм әтием дә, шулай ук мин дә. Куштан булып тумаганмын, куштан булып яшәмәдем һәм куштан булып тапланмыйча үләрмен.

***

Куштанлыкны бүре булып ашап бетерер идем.

***

Хайван баласын ярата һәм аны ялый, ә кеше баласын ярата һәм үбә. Димәк, кеше дә хайван. Ә кайберәүләр балаларын үтерәләр, димәк, алар хайваннан да әшәкерәк.

***

Табигатьнең кешедән көлүе тормыш дип атала.

***

Тормышта күп эшне вакытында эшләмәү, ягъни соңга калып эшләү яхшырак.

***

Тормышны алга этәрмәскә кирәк, алга җибәрмәс өчен тырышырга кирәк, чөнки тормыш алга атлау белән, үлемеңне дә якынайтасың. Шуның өчен тормышыңны артка өстерәү – прогрессив күренеш.

***

Бу чорда яшәү өчен, үз-үзеңне сөяргә кирәк.

Шәүкәт Биктимеровның куен дәфтәрен Ләбиб Лерон укыды.

"Безнең мирас". – 2024. – №5. – Б.108-109.