Зәринә СӨНГАТУЛЛИНА: «АВЫЛ КЫЗЫ МИН», ДИМ...

Авыл өчен артык ялкау булсам,

Шәһәр өчен артык тырыш мин.

Күкәй, бәрәңгегә хаҗәт туса,

Авыл эшенә дә карышмыйм.

Авыл өчен артык кәттә үзем,

Шәһәр өчен – «колхоз баласы».

Һаман «колхоз» юлларында күзем,

Тик анда да килми каласы.

Шәһәр котырганын яратам да,

Авыл тынычлыгын юксынам.

Шәһәр тыгызлыгы артык иркен,

Авыл киңлекләре тар сыман.

«Авыл кызы мин», дим, горурланып,

«Мин шәһәрдә яшим» – мактанам.

Тузмасын тик ыспай галошларым

Шәһәр-авыл юлын таптаган…

Кызыклы һәм файдалы язмалар белән танышып бару өчен «Вконтакте» төркеменә кушылыгыз.