РОБЕРТ ӘХМӘТҖАНОВ: «ТУКАЙ ЯЗЫ»

Таң җиледәй акрын гына кагылып,
бүген җанны Шигырь уятты:
– Тор, шәкертем, килеп җиттек Язга!
Тукай язы. Дөнья яп-якты!
Бу – безнең Яз, Тукай, халкың язы!
Яз Тукае булып каласың.
Ватан-ана пакь хисләргә били
назга мохтаҗ үскән баласын.
Зәңгәр киңлекләрдә апрель җиле
сөенеп исә туган көнеңдә.
Назлы Тукай түгел, язлы Тукай,
моңлы сазлы Тукай бүген дә.
Кояш нуры булып сиңа төшкән
бөтен күңелләрнең назы бу.
«Хөр мәмләкәт, хөр Русия» дигән
Шигъри республика язы бу!