Алсу ШАКИРОВА: «ЯЛГЫШ...»

Әнә ул кар йомарлый да, сак кына

селтәнеп, тәрәзәгә ыргыта...

Синең күзләр – ак абага чәчәкләре... (Марсель Галиев)

Тәрәзәмә чирткән тавыш

Бигрәк якын, бигрәк таныш,

Ишетелә чак-чак кына

Әллә чынлап, әллә ялгыш.

Йөрәгемә кергән сагыш

Әллә ялгыш, әллә каргыш...

Күңелемне чәнчеп торган

Сагыш мәллә минем язмыш?

Хәтеремдә синең сулыш –

Үзе рәхәт, үзе ялгыш,

Гарасатлар купкан мәлдә,

Кинәт пәйда булган балкыш.

Кулларыңда – минем язмыш.

Әллә уйнап, әллә ялгыш...

Ялгызлыктан сулган чакта

Җан тынычлыгымны табыш.

Киләчәгем – синсез тормыш...

Яшьләремә көлү катыш,

Нәүмизлеге чиктән ашкан

Ялгышлыктан чыккан язмыш.

Кызыклы һәм файдалы язмалар белән танышып бару өчен «Вконтакте» төркеменә кушылыгыз.