Биш сәгать дәвамында Татарстанда барлык сайлаучыларның 37,97 проценты тавыш биргән

Сайлаучылар активлыгы буенча Кайбыч районы беренче урында – 80 процент

(Казан, 13 сентябрь, “Татар-информ”, Гөлнар Гарифуллина). Бүген сәгать 12 гә булган мәгълүматлардан күренгәнчә, Татарстанда 1 млн 102 мең 147 сайлаучы үз тавышын калдырган - бу сайлаучыларның гомуми санының 37,97 процентын тәшкил итә.
Шул хакта бүген брифингта ТР Үзәк сайлау комиссиясе секретаре Надежда Борисова хәбәр итте. Аның сүзләренә караганда, сайлау участокларында эш тәртибенә карата әлегә шикаятьләр юк. Участок комиссияләре төгәл закон нигезендә эшли.
Надежда Борисова әйтүенчә, сайлаучылар активлыгы буенча Кайбыч районы беренче урында – 80 процент, Апаста активлык - 76, Аксубайда - 73 процент дәрәҗәсендә. Чистай белән Кукмарада активлык, башкалар белән чагыштырганда, түбәнрәк. “Без сайлаучылар бакчалардан, урманнан кайтып, участокларга килер дип ышанабыз”, - диде ул.
Казанга килгәндә, Киров, Авиатөзелеш, Яңа Савин районнарында сайлаучыларның тавыш бирү күрсәткече 24 проценттан артык.
Н. Борисова сүзләренчә, уңай һава торышы, кандидатларның яхшы агитацион сәясәте сайлаучыларның килү күрсәткечләренә йогынты ясый.