Саран теща (мәзәк)

Хатынның анасын урысчалатып теща дип йөрттеләр безнең якларда. Бер танышым сөйләде. Шулай бервакыт күрше авылга тещаларына кунакка баралар болар хәләл җефете белән.

Авырып урында ятса да, кызы белән киявенең парлап чәй эчкәннәрен чаршау ярыгыннан гына күзәтә карчык. Кызын үз янына чакырып ала да:

– Кияү чәенә өч шакмак шикәр салды. Эрегәнче берсен ал әле тизрәк‚ – дип пышылдый икән тегеңә.

Моны ишетеп алган кияү дә аптырап калмаган, әлбәттә:

– Әбекәем, бер дә борчылма, хәзерге шикәрләр элекке сыман бик баллы түгел алар, – дип куйган, кайнар чәен калак белән болгата-болгата.

Ягсуп Мортазин

Безнең мирас. - 2020. - №7.

Фото: pixabay