Редакция хәбәрләре Уку өчен 1 минут

Ә кешегә кеше кирәк икән...

Администратор сайта

Караулар 1010

Дата 24 сентябрь 2019

Ә кешегә... кеше кирәк икән -
Салкын төндә өстен ябарга,
Эштән кайтып кергән чакларында
Ашын салып көтеп торырга.
"Миңа язган тиңем", - диеп дәшеп,
Иң яхшысын җирдә эзләмичә,
Кирәк икән, кирәк кемдер берәү.
"Үземнеке"диеп яшәү өчен.
Ә кешегә кеше кирәк икән -
Салкын кичтә учак ягардай,
Сулар һава өчен сихәт булып
Эссе көндә яуган яңгырдай.
Иптәш булыр өчен кеше кирәк:
Таңнар каршыларга җәйләрдә.
"Ә киләчәк шундый ерак", - диеп,
Һәр кич саен бергә чәйләргә.
"Кайтуыңны хәбәр ит!" - дияргә
Озатучы кирәк - сәфәргә.
Ерак юлдан кайтып кергән чакта
Каршылаучы кирәк һәркемгә.
Чәчләреңнән сыйпап: "Син бүгеннән,
Ялгыз түгел бит", - диюче кирәк.
Көзләрендә җылы булсын өчен
Кешегә бит бары кеше кирәк.
Гөлназ ГАЗИЗОВА

Кызыклы һәм файдалы язмалар белән танышып бару өчен Вконтакте төркеменә кушылыгыз.