Яңа йортлар арасыннан үтәм

Яңа йортлар арасыннан үтәм,
Син яшисең шушы тирәдә.
Бу йортларның тик кайсында икән...
Кайсы катта? Кайсы бүлмәдә?
Якты нурлар сибеп йолдыз-күзләр
Бу йортлардан карый йөзәрләп...
Урам якка төшкән зәңгәр эзләр,
Кар-күбәләк уйный тирәләп.
Нинди шәүлә каплый ут яктысын,
Пәрдә артында кемнең гәүдәсе...
Бу йортларның кайсы синеке соң,
Кайсы катның кайсы тәрәзәсе?
Синең утың, бәлки, бу йорттадыр,
Шушы чатка тарта аяк та...
Сиңа, бәлки, бары бер тотамдыр,
Бер адымдыр... Ләкин кай якка?
Бу йортларның үтеп кай баскычын,
Кайсы звонокка үреләсе?
Бу йортларның кайсы синеке соң,
Кайсы каты, кайсы бүлмәсе?
Клара Булатова
Фото: pixabay