Үз якының кирәк

Өелеп-өелеп кайгы килгән чакта,
Таратырга аның өерен,
Күп булса да дуслар тирә-якта,
Үз якының кирәк, үз ирең.
Иркә сүзләр, әйдә, сөйләмәсен,
Чибəркәем, назлым, димәсен.
Сөйләмәсен, әйдә, син барыбер
Үз икәнен аның беләсең.
Син барыбер ул яныңда чакта
Авырлыкны җиңел җиңәсең.
«Ялгыз гына җиңә алмас идем,
Син бар әле ярый», — диясең.
Өелеп килгән кайгы катламнарын
Икәү бергә булгач җиңәсең.
Клара Булатова
Фото: pixabay