Туйда ачы димәгез!

«Ачы!», «Ачы!» диеп кычкырдылар,
бәллүр касә тотып кулларына.
«Ачы!», «Ачы!» диеп кычкырдылар
Яшьлегемнең татлы туйларында...
Туйлар ерак калды... «Ачы!», «Ачы!» -
колагымда һаман шул ук тавыш.
«Ачы!», «Ачы!..» Ялгыз түшәгемдә
куенына ала сары сагыш...
«Ачы!», «Ачы!..» — ачы җилләр исә,
каршы җилең, тормыш, бигрәк ачы!
Йөзгә бәрә ачы бураннары...
Ялгыз барам ачы җилгә каршы.
Кайтып кайчак татлы минутларга,
бер суларга төшәм, бер утларга...
Уралды да мәңге калды инде
туй күлмәгем язгы шомыртларда!
Роберт Әхмәтҗанов
Фото: pixabay