Нихәл?!

Ни дип кенә көтте икән безне —
Бер оядан очкан кошларны,
Дөньялыкның күбәләкле җәе,
Уйчан көзе, моңсу кышлары?
Тәпи тибеп без оядан очтык…
Җан кайларга барып сыенсын?
Зимагурлыкка без калдык илдә,
Җил ашады оя җылысын!
Дөньялыкның чиксез тарафына
Илтеп адаштырган язмышның,
Казакъ, Әфган, Сахалинның күген
Яктыртты бу оя яктысы.
Оядашлар очтык таралышып…
Дәшәм:
— Нихәл, димен, — бишектәш?
…Рәхмәт, язмыш,
Бик тә ярый безгә
Оядашлар белән бишектәшләр
Бу заманда
Берсе-берсенә дәшкәч… Ишеткәч!..
Зөлфәт 
Фото: pixabay