Күзләреңә чумган гына идем...

Иренеңә кайчан кагылдым да
Иңнәреңә кайчан сарылдым?
Шашкын булдым микән мәхәббәттә,
Вулкан булдым микән — ярылдым.
Күзләреңә чумган гына идем,
Төпкелләргә туры килдемме?
Кайгыларның кара урманында
Ешкынлыкка барып кердемме?

Әле генә куеныңда идем,
Дуенында идем сөюнең...
Газап күрмәгәннәр белми булыр
Кайгылардан кара көюне.
Иңнәреңә кайчан сарылдым соң,
Иренеңә кайчан кагылдым?
Ялгызлыкка бирмәс өчен җанны
Җырларыңа төрдем, кабындым.
Эльмира Шәрифуллина 
Фото: pixabay