Киңәш

Күңел кошың канат җилпеп очмас борын,
Урман, таулар, диңгезләрне кичмәс борын,
Шатлан əле, сөй дөньяны, уйна да көл,
Күз яшьләрең төрелеп-төрелеп төшмәс борын.

Күкрәгеңдә тормыш уты капмас борын,
Йөрәк каның сыгылып-сыгылып акмас борын,
Болгар кызы кара күзен мөлдерәтеп,
Яшь күңелгә сүнмәс ялкын якмас борын.

Шатлан əле, сөй дөньяны, уйна да көл,
Тормыш тавы басып, кысып измәс борын,
Чык сәхрага, рәхәт тормыш көен көйлә,
Сандугачың күкрәгеңдән бизмәс борын.

Киң диңгездә колач салып бер йөзеп кал,
Дулкынлары тау-тау булып купмас борын,
Каек белән әйләнмәдә әйләнеп кал,
Упкынлары мәңгелеккә упмас борын.