Харрас Әюп (1946-2008)

Артык та һәм ким дә түгел:Дөнья – бары бер гомерлек; Җирдә безгә бертуктамый Гомер буе йөгерерлек!..
***
Илләр имин чакта – бәхетле мин,

***
Шушындадыр бу дөньяның Бәрәкәтләр ятар җире: Уятадыр, уйлатадыр, Юатадыр татар җыры...

***
Илендә бер аты калмаганда, Алмаштырды җырлар бар атны. Ат тарталмас кайгы-хәсрәтләрне Җыр күтәрде, җырлар таратты.

***
Булыр-булмас арба юл бозар, ди, Булыр-булмас мулла дин бозар...

***
Барыбыз да – ата балалары, Һәркайсыбыз – бала атасы. Никадәрле тармаклансак та без, Тамырыңа кире кайтасы.

***
Язмыш бердер барлык чорларда да: Агач булса – балта табыла. Ләкин белә тарих агачларның балталарны ваткан чагын да...

***
Гомер буе кеше йөгермәктә, Бөтен күргәннәре – бер йөрәктә. Язмышларны узып киталмыйбыз, Никадәрле генә йөгерсәк тә!..

***
Белеп торам: елау – бәхет түгел,Кызыкмыйдыр һичкем елауга; Тик шунсы бар – безнең бу гомердә Бәхет түгел елый алмау да.

***
Тыштан күпме ялтыраса да ул, Мәкерлекнең һаман эче кара.

***
Заманнарга тынгылык юк икән, Җир йөзендә яраланса халык...

***
Киткәннәрнең йөрәк уты булып, Киләчәккә бара исәннәр...

***
Мәкер өчен түгел безнең хәтер, Зураймыйдыр һичкем үч алып. Бүгенгесен, үткәндәген җуйса, Киләчәктән мәхрүм ул халык.

***
Азга гына килә җиргә кеше – Хәтерләрдә гомер озая.

***
Без дә җирнең бер җәйләре генә, Бер генә кат яфрак ярабыз. Шатлык булып киләбез дә җиргә, Сагыш булып китеп барабыз...

Шигъри гыйбарәләрне Ләбиб Лерон әзерләде.

Кызыклы һәм файдалы язмалар белән танышып бару өчен Вконтакте төркеменә кушылыгыз.