Каян алдың?

Әй син, йөрәк,
Сансыз йолдызларның -
Матдәнең бер җанлы кисәге!
Каян алдың сөю, сагынуларны,
Каян алдың син бу хисләрне?!
Киләчәктә
Кирәк булмас, бәлки,
Юксынулар, сагыну, сөюләр,
Күңелдәге изге һәйкәлләрне
Искә алып, башны июләр?!
Киләчәктә, бәлки, кирәк булмас, -
Ташлап китү кирәктер, бәлки?
Ə ташланмый,
Матәм көне саен
Йөрәк, мескен, әрни дә əрни.
Кешенең син, ахры, һәрбер хисен
Киләчәккә алып барырсың;
Анда да син шулай сөя торган,
Сагына торган булып калырсың!
Егерменче гасыр уртасына
Килеп җиткән бөек мәхәббәт,
Күрәм, күрәм: җиңә алмый сине
Һичкем, һични, һичбер һәлакәт!
Хәсән Туфан
Фото: pixabay