Кар шатлыгы

– Ялангач агачлар, сары яланнар, корыган чишмәләр! – Матурлыгыгызның сулуы белән, матурлыкны сөйгән күңелләрне, яшәргә теләп типкән йөрәкләрне суырып тордыгыз.

– Үләбез!

– Сүнәбез!

– Матур кочагыбызда матурлыкны сөеп туймаган кешеләр килегез! Кайгырып башларыгызны иегез!.. Туңган өстебезгә кайнар яшьләрегезне түгегез! дия идегез. Инде тынычланыгыз!..

Сүнгән матурлыгыгыз белән кешеләрнең шат рухларын суырып борчылмагыз!

– Аһ, шатланырга тели идем!

Күкрәгемнең чиксез шатлыктан, ташып тулкынлануын тели идем. Күзләрем белән шиңгән чәчәк урынына яңа-яңа матурлык эзли идем. – Ахыры таптым.

Ахыры мин дә күзләрем белән елмайдым. Йөрәгем белән сөендем…

– Күрәсез!

Әнә ничек салмак кына, җилбезәкләнеп ак мамык карлар ява.

Көзнең күңелсез кара-соры төсе яңа матур аклык белән чорнала… Ә һава, һава – кар салкыны аңкыган саф һава – кайнар йөрәккә шундый дәва!

– Менә күзләремне йомам да сулыйм!.. Өзелеп сулыйм!..

Аһ, шундый иркен, шундый рәхәт, чиксез рәхәт, тирән сөенечтән!

Күкрәгем салкын һаваның кайнар шатлыгы белән тула…

– Менә. Аңлыйсызмы?!

Яшәргә теләү шундый көчле, яңа шатлык, яңа матурлыклар сорау шундый чиксез, киләчәк көннәремне сагынып сөенгән күңелем шундый-шундый керсез…

– Көннәрем, таңнарым, беренче кар шатлыгыдай яңа шатлык белән, салкын кар һавасыдай саф, таза хисләр белән тулсыннар!

– Ак мамык карлар җиргә яусыннар!..

Яусыннар!.. Яусыннар!..

Басмага Ихтыяр Кыямов әзерләде.

Кызыклы һәм файдалы язмалар белән танышып бару өчен Вконтакте төркеменә кушылыгыз.