Баш куясы иде алларыңа...

Баш куясы иде алларыңа,
бармакларың чәчне тарасын...
Ераккарак миннән киткән саен,
якыная гына барасың.
Баш куясы иде алларыңа.
Талгын гына аккан җырыңны
тыңлар идем дәшми,
тояр идем
серләреңне,
йөрәк җылыңны.
Баш куясы иде алларыңа.
Сөюеңне килә тоясым.
Күз алдымда тузган чәчең белән,
елмаюың белән торасың.
Баш куясы иде алларыңа,
түземнәрем җитмәс күк инде...
Күзләреңә карап әйтер серләр,
сөйләшәсе сүзләр күп инде.
Кадыйр Сибгатуллин
Фото: pixabay