Апрель

Зәңгәр күзле күккә сипкел төшкән —
Болытлары яна төрткел-төрткел.
Канат очларына җылы элеп,
Батыр кошлар кайта төркем-төркем.

Чат ябышып түбә кыегына,
Боз малае елый ачуланып.
Бөдрә гөрләвекләр кочагына
Егылалар апрель тамчылары.

Җир-әнкәнең мамык куеныннан
Чирәм яшел томшыкчыгын сузган.
Каен кызы кыенсынып кына,
Тез йомрысын юып тора суда.

Кыйгач-кыйгач бизәк кош юллары,
Очкыч сызган сукмак — ак маяк.
Яфрак чыгарырга маташмакчы
Көтү куалыйсы тал таяк.

Сут йөгергән агач бөреләре
Шертләп ярыла — җанда кайтавазлар.
Көйсез кышны елатыплар куып,
Туган җиргә кабат кайта язлар!