Уразада нәрсә ярый, нәрсә ярамый?

Рамазан аенда көн саен ураза тоту балигъ һәм акылы булган һәр мөселман өчен фарыз гамәл булып санала.
Уразада түбәндәгеләрне кылырга ярамый:
1) файдасыз сүзләр сөйләү;
2) мунчага кереп озак утыру;
3) суга чумып коену;
4) берәр ризыкны татып карау;
5) берәр ризык яисә сагыз чәйнәү;
6) ифтар ашамыйча, ике көн рәттән ураза тоту;
7) авыздан үбү;
8) нинди дә булса гөнаһлы гамәл кылу;
9) авыруыңның көчәюен белеп, ураза тоту.
Уразада түбәндәгеләрне кылырга мөмкин:
1) сатып алыначак малны татып карау;
2) балага ризык чәйнәп бирү;
3) күзгә сөрмә тарту;
4) мыек һәм иренне майлау;
5) тешләрне чистарту;
6) кан алдыру;
7) сөлек салдыру;
8) комган белән госел коену;
9) мунчага кереп аягүрә тирләп чыгу;
10) сабын белән юыну.
Уразаны бозучы өч гамәл:
1) борчак кадәр генә булса да берәр ризык яисә дару йоту;
2) бер тамчы кадәр генә булса да су йоту;
3) якынлык кылу.

Чыганак: Гыйбадәте Исламия - Казан: "Хозур" - "Тынычлык" нәшрият йорты, 2017 - 176 б.

Фото: pixabay