Айга кырын карама (19-25 июль)

Халык медицинасы чаралары белән дәвалануга керешкәнче, табиб белән киңәшү зарур!

19 июль (шимбә). Мөхәррәм аеның 24 нче көне. 25 нче Ай тәүлеге. Ай Үгезбозау йолдызлыгында,  22.37 сәгатьтә калка,  15.11 сәгатьтә бата. 4 нче фаза. Көн озынлыгы  16.48 сәгать.

Интуициягә таянырга була. Сизү әгъзалары, баш, колак, кан тамырлары зәгыйфь. Энергияне юк-барга сарыф итәргә ярамый. Ач тору файдалы.

Сихәтле  сок

Кызыл чөгендер согы бигрәк тә хатын-кызларга файдалы, тик аны кишер согына кушып эчү мәслихәтрәк. Чиста чөгендер согы эчү күңелне болгатырга, башны әйләндерергә мөмкин. Күрем көннәрендә 2-3 тапкыр 50-100әр грамм чөгендер-кишер согы катнашмасы эчәргә кирәк. Климакс вакытында тәүлегенә 1 стакан сокны әкренләп эчеп бетерү дарулардан яхшырак дәвалый. Чөгендер согында 20 процент калий бар, ә составында 8 процент хлор булу аңа бавырны, бөерне, үт куыгын чистартырга мөмкинлек бирә. Әлеге соктагы 50 процент натрий һәм 5 процент кальций нисбәте, куе канны сыегайтып, веналарның варикоз киңәюе, югары кан басымы, йөрәк авыруларыннан саклый.

20 июль (якшәмбе). Мөхәррәм аеның 25 нче көне. 26 нчы Ай тәүлеге. Ай Игезәкләр йолдызлыгында, 23.00 сәгатьтә калка,  16.51 сәгатьтә бата. 4 нче фаза. Көн озынлыгы  16.45 сәгать.

Һәртөрле вәсвәсәләргә бай көн. Тәэсирләнүчәнлек арта, чит кеше йогынтысына бирешүчәнлек көчәя.  Килешүләр төзү уңышлы. Нерв системасы, аяк зәгыйфь. Балык, мүк җиләге, сөт ризыклары ашау файдалы.

Инсульттан соң

Инсульттан соң, дарулар эчү белән бергә, көненә 1 әр лимон ашау да файдалы. 2-3 атна буе, ашарга 1 сәгать кала яки ашаганнан соң сәгать ярым вакыт үткәч, чирегешәр лимон ашап куярга кирәк.

21 июль (дүшәмбе). Мөхәррәм аеның 26 нчы көне. 26 нчы Ай тәүлегенең дәвамы. Ай Игезәкләр йолдызлыгында,  23.40 сәгатьтә калка,  18.23 сәгатьтә бата. 4 нче фаза. Көн озынлыгы  16.41 сәгать.

Һәртөрле вәсвәсәләргә бай көн.Тәэсирләнүчәнлек арта, чит кеше йогынтысына бирешүчәнлек көчәя.  Килешүләр төзү уңышлы. Нерв системасы, аяк зәгыйфь. Балык, мүк җиләге, сөт ризыклары ашау файдалы.

Эчәклекне чистарту

Яртышар стакан дөге һәм солы ярмасын юып, 2,5 стакан суда куерганчы пешерәләр дә, икегә бүлеп, иртән һәм кичен майсыз ашыйлар. Тоз өстәргә ярый. Дәва курсы – 2-3 көн. Мондый ботка эчәклектәге бөтен кирәкмәгән нәрсәләрне чыгара, эчәк тышчасындагы җәрәхәтләрне дә төзәтә.

22 июль (сишәмбе). Мөхәррәм аеның 27 нче көне. 27 нче Ай тәүлеге. Ай Кысла йолдызлыгында, 23.56 сәгатьтә калка,  19.43 сәгатьтә бата. 4 нче фаза. Көн озынлыгы  16.39 сәгать.

Бу көннәрдә организм хәлсез, шунлыктан күбрәк йоклау файдалы. Нерв системасы, сизү әгъзалары зәгыйфь. Кан һәм лимфа авырулары кискенләшергә мөмкин. Кан басымын контрольдә тоту сорала.

Баллы компресс

Ютәл җәфаласа, киҗе-мамык тукымага бал сылап, сырхауның аркасына ябалар, өстеннән пергамент кәгазе һәм җылы шарф урыйлар. Баллы компрессны төнгә каршы куялар. Ул ютәлне бик әйбәт баса.

23 июль (чәршәмбе). Мөхәррәм аеның 28 нче көне. 28 нче Ай тәүлеге. Ай Кысла йолдызлыгында,  0.43 сәгатьтә калка,  20.13 сәгатьтә бата. 4 нче фаза. Көн озынлыгы 16.35 сәгать.

Айның иң яхшы көннәреннән берсе. Энергетикасы бик уңай. Көтелмәгән очрашулар берсеннән-берсе кызыклырак булачак. Хисләр тернәкләнә, аралашу теләге уяна. Сизү әгъзалары, аеруча күзләр зәгыйфь. Кан басымын контрольдә тоту зарур. Организмны чистарту, ач тору уңай нәтиҗә бирә.

Чикләвек сөте

Ашказаны җәрәхәтеннән интеккәндә, чикләвек сөте эчү файдалы. 4-5 әстерхан чикләвеген төеп, өчтән бер стакан кайнаган җылы су өстиләр, 30 минут төнәтәләр дә, яхшылап болгаталар. Аннары сөзәләр, 1 чәй кашыгы бал кушалар. 10 көн дәвамында, көненә  5 тапкыр, ашарга ярты сәгать кала, 1әр чәй кашыгы кабалар.

24 июль (пәнҗешәмбе). Мөхәррәм аеның 29 нчы көне. 29 нчы, 1 нче Ай тәүлекләре. Ай Арыслан йолдызлыгында, 2.08 сәгатьтә калка,  20.38 сәгатьтә бата. 22 сәгать 11 минуттан яңа Ай. Көн озынлыгы  16.32 сәгать.

Авыр энергетикалы көн. Бернинди вәгъдәләргә дә ышанырга ярамый. Бизләр системасы, кан тамырлары, эчәклек зәгыйфь. Үзеңне үпкәләткән кешеләрне кичерү зарур. Арып-талганчы эшләргә, артык кайнар ризык ашарга ярамый.

Подаградан – алма согы

Подагра (тоз утыру авыруы) интектергәндә, яңа сыгылган алма согы эчү бик файдалы. Яисә 2 литр суга 3-5 алманы турап, ябык савытта 10 минут пешерәләр, 4 сәгать төнәтәләр һәм көн буе эчеп бетерәләр. Чәйгә алма турап эчү дә яхшы.

25 июль (җомга). Мөхәррәм аеның 30 нчы көне. 2 нче Ай тәүлеге. Ай Арыслан йолдызлыгында, 3.42 сәгатьтә калка, 20.52 сәгатьтә бата. 1 нче фаза. Көн озынлыгы  16.29 сәгать.

Яңа туган Ай Җир белән Кояш арасында, үзенең караңгы ягы белән Җиргә караган. Ай идарә итә торган һәрнәрсә – хисләр, кәеф, хәтер, кан басымы зәгыйфь. Кан басымы болай да түбән булган гипотониклар өчен бигрәк тә авыр вакыт. Бу чорда укуда уңышлар, тиз савыгу, югары эшчәнлеккә өметләнергә ярамый. Ашаганда талымлы булу хәерле. Аралашуны чикләү зарур.

Кыздыра беләсезме?

Кыздырылган тавыкның тиресе кетердәп торсын өчен, берничә ысул бар: 1) мичкә тыкканчы, тавыкны газ өстендә атланмайда кыздырып алалар; 2) мичкә тыккач, бүленеп чыккан тавык маен әкренләп өстенә агызгалап алалар, соңгы 10 минутта исә тимиләр - тире кибеп китә һәм тагын да яхшырак кетерди; 3) мичкә тыгар алдыннан тоз, борыч һәм зәйтүн мае белән ышкыйлар; 4) әзер булыр алдыннан бал һәм май катнашмасы белән майлыйлар; 5) пешеп җитәр алдыннан тавыкны 3 өлеш соя (кытай борчагы) соусына 1 өлеш бал кушып майлыйлар.

Алсу Зәйдуллина

«Мәдәни җомга» газетасы 

Кызыклы һәм файдалы язмалар белән танышып бару өчен «Вконтакте» төркеменә кушылыгыз.