Татарстан Хөкүмәте изоляция вакытында махсус рөхсәт алу тәртибен раслады

🏷 Администратор сайта

Татарстан Премьер-министры Алексей Песошин үз-үзеңне изоляцияләү вакытында татарстанлыларга хәрәкәт итү хокукын бирә торган махсус рөхсәтләр алу тәртибен гамәлгә кертә торган карарга кул куйды.

Гражданин 2590 номерына бушлай SMS-хәбәр җибәрә. Анда буш урын калдырылмыйча түбәндәге текст язылырга тиеш: теркәлү адресы#фамилия, исем, отчество#паспорт сериясе һәм номеры#адрес, фактик яшәү урыны#шәхси мәгълүматны эшкәртүгә рөхсәт бирү (мәсәлән, РЕГИСТРАЦИЯ#Ахметзянов Рамиль Нуруллович#92199632506#Казань Нигматуллина 5 квартира 9#Согласен(а) на обработку персональных данных)

Әлеге хәбәрне язу шәхси мәгълүматны эшкәртүгә рөхсәт бирүне белдерә.

Аннан соң 2590 номерына «ЦЕЛЬ» сүзе белән башлап, урамга чыгып йөрү максатларын язып җибәрергә кирәк.

Судка бару, балигъ булмаган баланы белем бирү оешмасына илтү, медицина яки ветеринария оешмасына бару, туганын җирләүдә катнашу, паспорт алу яки яңадан торгызу өчен рөхсәт алырга мөмкин. Моннан тыш, рөхсәтне дачага бару, почта һәм кредит оешмаларына бару өчен алырга була. Шулай ук рөхсәтне авыру туганнарына дару, азык-төлек һәм беренче чиратта кирәк булган әйберләр илтү яки аларга ярдәм күрсәтү өчен рәсмиләштерергә мөмкин.

Гражданин уникаль рөхсәт коды белән җавап SMS-хәбәр алса, хәрәкәт рөхсәт ителгән дип санала.

Ашыгыч медицина ярдәме сорап мөрәҗәгать иткәндә, шулай ук азык-төлек сатып алырга кибеткә чыкканда, йорт хайваннарын урамда йөрткәндә, чүп түгәргә чыкканда, рөхсәт алырга кирәкми.

Чыганак: Татар-информ