Җырчы Хәмдүнә Тимергалиеваның тууына 75 ел

Җырчы, ТАССРның атказанган артисты (1987), Татарстан Республикасының халык артисты (1991), Башкортстан Республикасының халык артисты (2020, вафатыннан соң) Хәмдүнә Сәетгали кызы Тимергалиева 1949 елның 24 маенда Башкортстанның Борай районындагы Котлыяр исемле кечкенә генә татар авылында дөньяга килгән.

Мәктәпне тәмамлагач, ул Уфа телефон элемтәсе станциясендә 4 разрядлы монтер булып эшли, Стәрлетамак мәдәни-агарту училищесын тәмамлый.

1976-1987 нче елларда – Казанда, Татар дәүләт филармониясендә җырчы.

Хәмдүнә Тимергалиева 1987 елда Татарстанның атказанган артисты исеменә лаек була. Ә 1991 елда аңа Татарстанның халык артисты исеме бирелә. Җырчының репертуарында меңләп җыр бар иде, шулардан ике йөзе – татар халык җырлары язмалары.

Җырчы 2020 елның 14 сентябрендә Казанда вафат булды.