Болыннарга чыккач

Болыннарга чыккач җырлыйсыңдыр
Тургай сайравына кушылып... -
«Көйгә салып, сине сагынмам» дип
Тәүбә итүләрең шушымы?

Болыннарга чыккач уйлыйсыңдыр
Тиңләп мине ялгыз каенга;
Үзем генә түгел, сөюем бар
Бирешмәслек сагыш-кайгыга.

Болыннарга чыккач, чәчәкләрне
Кочагыңа сөеп җыйганда,
Аптырама, күз яшенә түгел,
Чык суына алар чыланган.

Болыннарга чыккач, җырларыңны
Ишетә калсам, Ходай, бир түзем;
...Мəңгелеккә сине моңлы иткән
Үзем ич мин, бары мин үзем!