Кала-тауда булганыгыз бармы?

Бу төбәктә (Әтнә районы) туып үскән Әсгат Сәфәров 2000 нче еллар башында тауда гыйбадәт йорты төзетә. Аны 2015 елда генераль директоры Лотфулла Нурислам улы Шәфигуллин җитәкчелегендәге «ТАТТЕЛЕКОМ» ААҖ элемтәчеләре яңарта.

Җирле халык әлеге урынны «Ханнар зираты» дип йөртә һәм аны X гасырдагы Идел Болгарстаны идарәчеләре белән бәйләп карый. Казу эшләре вакытында ачыкланган материаллардан чыгып, галимнәр шәһәрлек әле IV-VII гасырларда ук җирле мәҗүси халык тарафыннан саклану урыны буларак файдаланылган дип фикер йөртә. Соңрак, Алтын Урда һәм Казан ханлыгы чорларында, ул илнең төньягындагы татар дәүләт форпостларының берсе булып торган. Бу турыда Шиһабетдин Мәрҗани язып калдырган.

Шәһәрлектән 400 метр читтәрәк «Изгеләр зираты» һәм «Изге чишмә» бар. Чишмәгә 159 басмалы баскычтан төшәргә мөмкин.