Хәсән Туфанның соңгы сүзләре

Ә хәзергә елыйм оялмыйча:

Ил күңеленнән мирас җырлар бар!

Рәдиф Гаташ

Гомерем буена мин шагыйрьләрдән көнләшеп тә, алар өчен сөенеп тә яшәдем: аларның Туфан кебек остазлары бар. Туфан, Сибгат Хаким кебек остазлары булган шагыйрьләр бәхетсез буламыни?

Шигьри дәвамы булып дөньяда калган шәкертләре яшәгән остаз, үзе вафат булса да, үлемсез ул. Аның рухы буыннарда дәвам итәр.

Хәсән Туфан, гомерендә фаҗигаләр кичерсә дә, бәхетле иде. Ул яшь буынга өмет белән карап яшәде, һәр әйбәт шигырь өчен, һәр өметле шагыйрь өчен ул сөенә иде. Иң соңгы сәгатьләренәчә ул яшь әдипләр турында уйлады.
- Мин сездән канәгать! Тукай исән булса, үзе сезгә рәхмәт әйтер иде!
Бу аның соңгы сүзләре.
Шагыйрь Туфан вафат, әмма «Туфан» дигән шигьри дөнья исән. Туфан мәңге китмәскә кайтты!

Рабит Батулла