Сине күрсәм

Сине күрсәм, яңа җырлар туа,
Сүнгән хисләр дөрләп кабына.
Күңелем, ахры, һаман сине сөя,
Җаным, ахры, һаман сагына.
Кара шулай, кара күзләремә,
Моңсу гына итеп, яратып.
Янсын, әйдә, йөрәк, янсын дөрләп,
Бер карашың өчен җан атып.
Сөюсез бит гомер - кояшсыз көн.
Сөюсез бит язлар - яз түгел.
Гомер үтә, кара көзләр җитә,
Сөюләрдән туймый тик күңел.
Чык син шулай, чык син юлларыма,
Күзләремә кара тын гына,
Ерагая барган көзге кояш
Нурын сипкән төсле моң гына...
Резеда Вәлиева
Фото: pixabay