Әллә ялгыштык микән?

Кичләр килде сүрелеп,
Гөлләр өздем үрелеп.
Сиңа əйтер сүзем калды
Шул гөлләргә төрелеп.

Җәйге кич тып-тын иде,
Тирә-юнь гел моң иде.
Әйтер сүземне әйтергә
Соң, дидем шул, соң инде.

Син дә бик моңсу идең,
Боегып башың идең.
- Үпкәләмә, очрашырга
Соң шул инде, соң, — дидем.

Кәккүк тавышын тыңлый-тыңлый
Су буйларын урадык.
Җәйге кичнең моңсулыгын
Аерылуга юрадык.

Шундый кичне, елый-елый,
Нигә аерылыштык икән,
Очырашмаска сүзләр куеп
Әллә ялгыштык микән?

Иртәгесен чыклар төште
Яраткан гөлләремә,
Күзләреңнең моңсулыгы
Калды гомерләремә.