Бу дөньяда ни генә юк?!

Бу дөньяда ни генә юк,
Биотогы, гипнозы,
Алсу йөзле татар кызы,
Кара тутлы рус кызы.
Менә берсе алда бара,
Текелдәтеп үкчәсен.
Бу чибәркәй каршысында
Йә, ничек тез чүкмәссең!
Зифа буйлы, шөпшә билле,
Аяклары! Я раббым!
Мәхәббәт ул шулдыр инде,
Бер күрүдә яраттым.
Күңелгә вәсвәсә салды
Бу фәрештә. Юк - шайтан,
Йортымны узып киткәнмен.
Гүзәлгә ияреп кайтам.
Биотоклар бар диләр бит,
Җибәреп карыйм мәллә?
«Әй, чибәрем... борылчы», - дим,
Тормышка ашты хәйлә -
Борылды бу! Тик шул хуттан
Чалтыратты яңакка.
Нишлисең, дим, шөпшә кызый,
Бер дә юкка, нахакка.
Гүзәл әйтә - иярмә, ди,
Кичә әнә бер адәм,
Ияреп килеп, трамвайда
Мең сум чәлде кесәдән.
Әнәс Хәсәнов
Фото: pixabay