"Мин сине бураннан эзләрмен..."

Мин сине бураннан эзләрмен,
Кыш килеп, кар күмсә юлларны.
Сагыштан тилергән мәхәббәт хакына
Чигерик үткәнгә елларны.
Мин сине җилләрдән сорармын,
Хәтерләп мең кабат сурәтең.
Җавапсыз җилләргә ышаныр идемме,
Мин сине яратам, күрәсең.
Мин сине эңгердә уйлармын,
Адашмас микән дип төннәрдә.
Яшемә чыланган иртәнге төшемне
Бәхеткә юрадым өннәрдә.
Мин сине барыбер табармын,
Сагынмас идем бит югыйсә.
Беркатлы өметне күңелдә бөтереп,
Эңгердә буранлап җил исә...
Гөлүсә Батталова
Фото: pixabay