Гөлүсә Батталова. Көрәшчеләр китә

Сабантуйсыз ятим мәйданнардан
Көрәшчеләр китә берәм-берәм...
Билен бирмәс, илен бирмәсләрнең
Кайтулары булмас - беләм... Беләм!
Көрәшчеләр китә... Мәйданнарда
Сирәк-мирәк таш һәйкәлләр калка.
Батырларга юллар ябылганда
Җилкуарлар өчен ничә капка?
Көрәшчеләр китә... Кала дөнья
Көн итәргә салкын йөрәкләрдә,
Мәйданнарда пәри туе ясап,
"Алла" булган котсыз өрәкләргә.
Сыегая дәвер буыннары,
Кәрләләнә җайлап кына бәдән.
Сабантуйсыз калган мәйданнардан
Көрәшчеләр китә берәм-берәм...
Гөлүсә Батталова
Фото: pixabay