Сәламәтлекне саклау хакында

Бервакыт Хөсәен углы Галидән бер насарани табиб: «Сезнең китабыгызда гыйлем тыйбтан (медицинадан) һичнәрсә юк», – диде. Гали: «Аллаһы Тәгалә гыйлем тыйбны Коръәннең ярты аятендә җыйды, – диде. – Ягъни: «Ашагыз вә эчегез, ләкин исраф кылмагыз», – дигән аятьтә». Моннан соң насарани табиб: «Рәсүлегездән (с.г.в.) тыйб хакында һич риваять юк», – диде. Гали әйтте: «Безнең Рәсүлебез (с.г.в.) аз гына сүзләрдә тыйбны җыйды, – диде. – «Ашказаны – авыруның өедер. Чама белеп ашау – дәваның башыдыр», – дигән Пәйгамбәребез (с.г.в.). Шулай ук пәйгамбәребез Мөхәммәднең (с.г.в.) бер хәдисендә, ашказанын өч өлешкә бүләргә, шуның бер өлешен – ризык белән, икенче өлешен эчемлек белән тутырырга, өченче өлешен һава өчен калдырырга кирәк, диелә». Шуннан соң насарани: «Сезнең китабыгыз һәм Рәсүлегез (с.г.в.) табибка медицина гыйлемен калдырган икән», – диде.