Пәйгамбәребез Мөхәммәднең (с.г.в.) хәдисләре

Әбү Муса разыйаллаһу ганһү риваять итә. Рәсүлуллаһ салләллаһу галәйһи вәсәллам әйткән: «Ике салкын вакыт намазын укыган адәм җәннәткә керер: иртәнге һәм икенде».

Буридә разыйаллаһу ганһү риваять итә. Рәсүлуллаһ салләллаһу галәйһи вәсәллам әйткән: «Шатлыклы хәбәр: караңгы төннәрдә мәчеткә йөрүчеләргә Кыямәт көнендә камил нур биреләчәк».

Җәбир разыйаллаһу ганһү риваять итә. Рәсүлуллаһ салләллаһу галәйһи вәсәллам әйткән: «Намазның фазыйләтлесе кыям, кыйраәт  озын булганы».

Әбү Һөрәйра разыйаллаһу ганһү риваять итә. Рәсүлуллаһ салләллаһу галәйһи вәсәллам әйткән: «Әгәр өммәтемә мәшәкать салуым булмаса, өммәтемә ястү намазын тәэхир белән (соңрак) укырга һәм һәр намазда мисвәк кулланырга боерыр идем».

Әнәс разыйаллаһу ганһү риваять итә. Рәсүлуллаһ салләллаһу галәйһи вәсәллам әйткән: «Кояшның саргаеп шайтан мөгезләре арасына кергәнен (ягъни мәкруһ вакытка кадәр) көтеп, Аллаһы Тәгаләне аз гына күңелдә тотып укылган намаз – монафыйк намазыдыр».

Буридә разыйаллаһу ганһү риваять итә. Рәсүлуллаһ салләллаһу галәйһи вәсәллам әйткән: «Икенде намазын куйган (калдырган) адәмнең гамәле юкка чыкты».

Текстны басмага Айсылу Вәлиева әзерләде.

«Безнең мирас». — 2022. — №10. — Б. 63.

Фото: pixabay

Хәдисләр Шәех әл-Камил Вәли әд-Динмөхәммәд бине Габделхатыйб әт-Тәбризинең «Мишкәтүль мәсабих» китабы буенча әзерләнгән һәм 1913 елда 3 китапта басылып чыккан.

Кызыклы һәм файдалы язмалар белән танышып бару өчен Вконтакте төркеменә кушылыгыз.