Зөлфәт. БЫЛБЫЛ

Килде кызның янып сөйгән яры:
— Мин башканы, — диде, — пар итәм,
Оныт минем кайнар назларымны.
Башканы сөй, сау бул, бар, иркәм!

…Өзгәләнде былбыл тал-тирәктә,
Тал-тирәкләр тузми сыгылды,
Кулдан балдак төшеп киткән сыман
Һавалардан йолдыз егылды…

Көлә-көлә кыз җавабын бирде:
— Вәгъдә бирдем мин дә ятка,— дип, —
Туй чукларын әти күптән инде
Әзерләде бүтән атка, — дип. —

Оныт, — диде, — минем назларымны,
Инде телим шуны әйтергә:
Насыйп булгач, шушы бер елганы
Без кичәрбез ике күпердән…

…Аерылдылар, артык балдак сыман
Һавалардан йолдыз егылды;
Бер ялгызы калгач, күз яшьләрен
Кутәралмый сылу сыгылды.

Өзгәләнде былбыл таңга кадәр
Җырларына җырны ялгады;
Бер ялгызы белде моңлы былбыл
Горур кызның изге ялганын…

Таң атуга сылу керфегендә
Күз яшьләре кибеп өлгерде,
Ул йөрәген кысты учларына…
Былбыл исә, былбыл… җан бирде…

Комментарий язарга