Вәгъдә биргән идең

Син кайтырга вәгъдә биргән идең,
Таң чыгыннан күзләр дымлангач.
"Дивана" дип тамга суктым җанга,
Күз алдында гәүдәң сынлангач.
Син сөяргә вәгъдә биргән идең,
Шәфәкъ кызыллыгы сүнгәнче.
Мәхәббәттән җан бирүең артык,
Сарыларга сабып үлгәнче.
Син калырга вәгъдә биргән идең,
Бәхетемнең карап күзенә.
Акыл инде сине көтеп арды,
Йөрәк кенә нидер сизенә.
Син кайтырга вәгъдә биргән идең –
Араларда янган күперләр.
Буш вәгъдәдән җылы тапмый сүнде
Мәхәббәттән калган күмерләр.