"Син кош булып кердең минем төшкә"

Син кош булып кердең минем төшкә,
очып киткән кошлар күк түгел.
Сайрый-сайрый очып килдең...
Ләкин
сыңар канат идең син бүген.
Очып килеп кундың иңнәремә,
бераз туңып,
бераз калтырап.
Бу кош мине нигә үз итте, дип
карап тордым, бераз аптырап.
Сылу идең,
бик тә иркә идең,
сайравыңны өзелеп тыңладым.
Бик таныш та иде, бик яңа да,
бик зарур да иде моңнарың.
Иңнәреңдә кошлар тою рәхәт,
кошларның да мондый сылуын.
Кулым белән мин орынган идем
күрдем сиңа канат чыгуын.
Белмәдем мин ничек юрарга да,
юрауларга күңелем яраксыз.
Аңладым мин бары шуны гына:
миннән башка син дә канатсыз.
Кадыйр Сибгатуллин
Фото: pixabay