Рөстәм Мингалим. ПАЛАТАДАШЛАРГА

Ә мин бүген төнлә йокламадым,
Тоймадыгыз гына сез аны…
Мин дәвалар өчен палатага
Алып кердем төнлә дөньяны.
Инде сулып килгән үләннәргә
Һәм гөлләргә сулар койдым мин.
Янып, әрнеп яткан мәйданнарның
Яраларын бәйләп куйдым мин.
Мин кан бирдем кайбер шәһәрләргә,
Мин җан өрдем кайбер юлларга.
…Зур дөньяның чирен бетерергә
Көч җитмәде минем кулларда.
Сезне уятырга кыймадым мин,
Уятасы калган шул аны…
Мин дәвалар өчен палатага
Алып кердем төнлә дөньяны.
1970

Комментарий язарга