Очрашу

Менә тагын без икәүдән-икәү,
Бер кешесез аулак акланда.
Әйдә, бүген мин дә акланмыймын,
Һәм шулай ук син дә акланма.
Сөйдек, сөябез һәм сөячәкбез,
Бу хокукны бездән кем алган?!
Тик нәрсәдер инде үтеп киткән,
Тик нәрсәдер инде югалган.
Безгә оят бугай кешеләрдән
Качып-посып болай очрашу.
Бер уйласаң, бу бит мәхәббәттән
Нибары бер хәер сорашу.
Ә мәхәббәт нинди бөек мөнбәр!
Без кайчандыр анда меналган.
Тик вакыты гына үтеп киткән,
Гүзәл мизгел инде югалган.
Еллар безне сакламаган, дустым,
Мәхәббәтне ләкин саклаган.
Саклануын күреп бу сөюнең
Сокланам да, аннан акланам,
Китмик әле, иркәм, акланнан...
Гәрәй Рәхим
Фото: pixabay