Кыз күңеле

Ник җырлыйсың димә, шашып-шашып,
өр-яңа җыр әле ятладым.
Унсигез яшь:
минем җырлый торган,
минем җырлый торган чакларым.
Ник елыйсың димә, ярсып-ярсып,
яшьлегемне җуйдым, тапмадым.
Егерме яшь:
Хәзер елый торган,
хәзер елый торган чакларым.
Ник йөрисең димә, качып-качып,
карашыннан куркам ятларның.
Егерме биш:
инде түзә торган,
инде күнә торган чакларым...
Кадыйр Сибгатуллин
Фото: pixabay