Кичер мине

Кичер мине, сөюемне саклап,
Гомер буе уйлап яшәгәнгә.
Төшләремдә өзгәләнеп эзләп,
Өннәремдә күргәч дәшмәгәнгә.

Кичер мине, озын төннәремдә
Сагынганга иркә-назларыңны.
Гаепләмәм, ак кышларда кабат
Кайтаралсаң якты язларымны.

Кичер мине, ап-ак бураннарда
Эзләп йөрим баскан эзләреңне.
Күңелемдә назлы бер җыр итеп
Саклыйм синең сөю сүзләреңне.

 

Әлфия Ситдыйкова

Комментарий язарга