Кая шулай ашыгасың, йөрәк?

Кая шулай ашыгасың, йөрәк?
Юлны күбрәк үтәр өченме?
Киләчәккә җитәр өченме?
Алгы көннәр ягына күз төбәп,
Кая шулай ашыга соң йөрәк?

Синең, бәлки, гомерең кыскадыр? —
Ашкынасың алгы көннәргә...
Син баш куйган зәңгәр гөлләргә,
Бәлки, берәр бәла поскандыр? —
Синең, бәлки, гомерең кыскадыр.

Һәр яңа көн - бүтәнчә яңа:
Һәрбер көннең аерым төсе бар,
Һәрбер көннең аерым эзе бар.
Кара, әйдә, туйганчы кара:
Һәр яңа көн - бүтәнчә яңа!

Безнең илләр юлы өстендә
Жуелмаслык итеп һәр иртә
Алтын эзләр калдырып китә,
Мәңгелекнең шушы төшендә, -
Безнең илләр юлы өстендә.

Кая шулай ашкына йөрәк?
Еллар тизрәк үтсен, дип микән?
Бу «язмышым» бетсен, дип микән? -
Килер көннәр ягына күз төбәп,
Кая шулай ашкына йөрәк?