«Йә, газиз баш! Өйдә ялгыз булгач…»

Йә, газиз баш! Өйдә ялгыз булгач,
Күктә балкып янгач язгы кояш,

Март җилләре җырга әйдәп торгач,
Җыр язмыйча, җанаш, торып булмас.

Борчуларың, әйе, җитәрлектер,
Хәйран башың вәйран итәрлектер.
Кайгыларың эчкә йотарлык бул,
Яшь коюдан тукта, тукта, нык бул!

Хак язганны үтәми калмассың,
Тәкъдиреңне үзгәртә алмассың.
Бу дөньяда күрәчәген күрми
Бер кеше дә, диләр, гүргә керми.

Шатлансаң да, очынудан тукта,
Кайгырсаң да, тыенкыдан чыкма.
Сабырлык кыл, яшь коюдан тыел…
Яшьле булды, яшьле булды бу ел.

Язлар тагын ни китерер инде,
Күрәсене башлар күрер инде.
Язлар тугач, күктә кояш булгач,
Җыр тудырмый калмас бу газиз баш.

 

Клара Булатова

Фото: pixabay

Комментарий язарга