Гашыйк ич мин сиңа

Гашыйк ич мин сиңа,
гашыйк ич мин,
чәчләремә карлар кунса да,
күзләремә сеңгән
сүнмәс яшьлек төсем
кояш, яңгырлардан уңса да.

Гашыйк ич мин сиңа,
йөрәгемдә
беркем кагылмаган хисләр бар.
Күзләремдә минем,
бәлки, син күрерсең:
уңмый торган җете төсләр бар.
Гашыйк ич мин сиңа,
күрмисеңме?
Керфекләрең генә күтәр син -
тик бер генә язга
моңлы күңелемне
чәчәк тулы бакча итәрсең.
Ренат Харис
Фото: pixabay